ҚР ПІБ Медициналық орталығының «Қарлығаш» балабақшасында Наурыз мейрамына арналған іс-шаралар бір апта бұрын басталды.
Балалар Наурыз мерекесіне арналған тақпақтарын айтып, ән салып, би биледі, қойылымдарға, сурет көрмесіне қатысты. Бүлдіршіндер сондай-ақ күш сынасты, асық ойнап, арқан тартты, орамал алу, теңге ілу, қыз қуу тәрізді ұлттық ойындардан сайысқа түсіп, ептіліктерін көрсетті.
Шараға балалардың ата-аналары мен ата-әжелері де тартылды. Олар кішкентай таланттардың өнерін тамашалап қана қоймай, қазақ халқының салт-дәстүрлері туралы әңгімеледі. Әжелер педагогтармен бірге «Бесікке салу» рәсімін көрсетсе, аталары бата берді.
Өскелең ұрпақты тәрбиелеу, қазақ халқының дәстүрі мен әдет-ғұрпын дәріптеу, Наурыз мейрамы арқылы балаларға рухани тәрбие беру мақсатында ұйымдастырылған мерекелік шаралар «Қарлығаш» балабақшасының барлық объектілерінде өтті.
