ПІБ Медициналық орталығының «Қарлығаш» балабақшасына Қырғызстан Республикасының педагогтары келді. Кездесу «Өрлеу» біліктілікті арттыру ұлттық орталығы» АҚ «Астана қаласы бойынша Кәсіби даму институты» ұйымдастыруымен халықаралық ынтымақтастық аясында өтті.
«Қарлығаш» балабақшасының директоры Бейбітгүл Казақпаева қырғызстандық әріптестерге мектепке дейінгі мекеменің атқаратын қызметі, жалпы балалардың денсаулығын сақтау және нығайту жолында атқарылып жатқан жұмыстарға тоқталды. Жиналғандар балалар іс-әрекетін тамашалап, тәрбие мен білім беру ісіндегі инновациялық әдістермен танысты. Экскурсиядан кейін балалардың моторикасы мен танымдық қабілеттерін дамытуға бағытталған «Бразилия технологиясы» шеберлік сыныбы ұйымдастырылды.
Шара аясында өткен дөңгелек үстел барысында Қырғыз Республикасының педагогтары алған әсерлерімен бөлісіп, пікір алмасты, сұрақтарына жауап алды. Сондай-ақ балабақша педагогтарының біліктілігі мен балалардың білімін атап өтті.
Айта кетейік, «Қарлығаш» балабақшасы алғаш рет шетелдік әріптестеріне тағылымдама өткізуде. Қонақтар балабақшасының озық тәжірибесіне қызығушылық танытып, Қырғызстан Республикасының мектепке дейінгі мекемелерінің педагогтарына көшпелі курстар өткізу туралы ұсыныстарын алға тартты.
Білім беру тағылымдамасы соңында Астана қаласы бойынша «Өрлеу» филиалы директорының м.а. Гульназ Есжанова «Қарлығаш» балабақшасының 11 педагогіне тәжірибе бөлісіп, ынтымақтастық қолдау көрсеткені үшін алғыс хаттарды табыстады.
Сондай-ақ, ҚР ПІБ МО «Қарлығаш» балабақшасы мен «Өрлеу» БАҰО» АҚ «Астана қаласы бойынша КДИ» арасында ынтымақтастық туралы меморандумға қол қойылды.
