ҚР ПІБ МО «Қарлығаш» балабақшасының №3 объектісінде «Мейірімділік жасайық» қайырымдылық жәрмеңкесі өтті. Балалар, ата-аналар және педагогтер өздері пісірген тәттілер, балабақшаның жылыжайында балалар күтіп-баптап өсірген бақша өнімдерін сатылымға қойды.
-Біз әрдайым тәрбиеленушілеріміздің мейірімділік, адалдық, қамқорлық сияқты қасиеттерді меңгеруіне күш саламыз. Қайырымдылық жәрмеңкесін ата-аналармен, балалармен бірлесіп ұйымдастырудағы мақсатымыз балаларды жақсылық жасауға баулу, осындай шаралар арқылы үлгі көрсету және «Мектепке жол акциясына» аз да болса өз үлесімізді қосу, – деді жәрмеңкенің ашылуында сөз сөйлеген «Қарлығаш» балабақшасының директоры Бейбітгүл Қазақпаева.
Шара балаларға үлкен әсер сыйлады, оған үлес қосқан ата-аналар да ұйымдастырушыларға алғыс білдірді. Қайырымдылық жәрмеңкесінен түскен қаражат мұқтаж отбасыларға мектепке керек-жарақ алуға жұмсалатын болады.
