«Бастау» бағдарламасы мектепке дейінгі балалардың жан-жақты дамуына бағытталған. Ол балалардың қозғалыс дағдыларын жетілдіруге, танымдық белсенділігін арттыруға, құндылықтарын қалыптастыруға, сондай-ақ когнитивтік және коммуникативтік дағдыларын дамытуға ықпал етеді. Бағдарламаның басты мақсаты – әр баланың шығармашылық қабілеттерін ашуға, танымдық белсенділігін арттыруға, әлеуметтік-эмоциялық құзыреттілігін қалыптастыруға және денсаулығын нығайтуға жағдай жасау.
«Бастау» бағдарламасы келесі міндеттерді шешуге көмектеседі:
• Қозғалыс белсенділігін дамыту. «Қызықты дене шынықтыру: «Доптың түрі көп, әрқайсысы керек!» және «Жүруден бұрын жүзуді үйрен!» бөлімдері балалардың салауатты өмір салтының негіздерін қалыптастыруға, қозғалыс координациясын дамытуға, бұлшықет жүйесін нығайтуға бағытталған.
• Когнитивтік және коммуникативтік даму. «Этникалық ертегілер» және «Ертегілер бойынша интерактивті қызмет алгоритмдері» бөлімдері баланың сөйлеу қабілетін, ойлауын, жадысын дамытып, дүниетанымын кеңейтеді.
• Зерттеушілік және интеллектуалдық даму. «Кванториумдағы тәжірибе ойындары: мектепке дейінгі балаларға арналған физика» бөлімі балалардың зерттеушілік дағдыларын, қызығушылығын және қоршаған ортаға деген танымдық ынтасын қалыптастырады.
«Бастау» бағдарламасының басты ерекшелігі – дербес оқыту тәсілі, ол әр баланың жеке қажеттіліктері мен қызығушылықтарын ескеруге мүмкіндік береді. Оқу процесінде QR-кодтары бар мобильді кітапхана, аудио материалдар, интерактивті ойындар белсенді қолданылады, бұл оқытуды көрнекі, қолжетімді және тиімді етеді.
Қазіргі уақытта «Бастау» бағдарламасы Абай, Жетісу, Павлодар және Маңғыстау облыстарындағы 10 мектепке дейінгі білім беру ұйымында апробациядан өтуде.
