Маусымдық аурулардың алдын алу және тәрбиеленушілердің денсаулығын сақтау мақсатында ҚР Президенті Іс басқармасы Медициналық орталығының «Қарлығаш» балабақшасында қызметкерлерді жыл сайынғы тұмауға қарсы вакцинациялау науқаны аяқталды.
Иммундау күзгі-қысқы кезеңде вирустық инфекциялардың таралуын болдырмауға бағытталған профилактикалық іс-шаралар кешені аясында жүргізілді. Вакцина балалармен тікелей байланыста болатын педагогтерге, медицина қызметкерлеріне, күту және қызмет көрсету мамандарына егілді. Барлығы 202 қызметкер вакцина алды.
Вакцинациялау процесін балабақшаның медициналық қызметі бақылады. Егудің алдында қызметкерлер міндетті медициналық тексеруден өтіп, педиатр-дәрігерден кеңес алды. Процедурадан өту үшін Қазақстан Республикасының Денсаулық сақтау министрлігі ұсынған сертификатталған вакцина пайдаланылды.
«Қарлығаш» балабақшасында тұмау мен вирустық аурулардың алдын алу жүйелі түрде жүргізіледі және күнделікті таңертеңгі фильтрден өтуді, санитарлық-гигиеналық іс-шараларды, тамақтану мен ішу режимін бақылауды, сондай-ақ ата-аналарға маусымдық аурулар кезінде балаларды қорғау бойынша ақпарат беруді қамтиды.
Қызметкерлердің вакцинациядан өтуі тек өз денсаулығына қамқорлық қана емес, сонымен бірге балалар мен әріптестер алдындағы жауапкершіліктің көрінісі. Өйткені ұжымдық иммунитет тәрбиеленушілер арасында жұқпалы аурулардың таралу қаупін азайтып, балабақшада тұрақты әрі сау микроклиматты сақтауға ықпал етеді.
Қызметкерлер мен тәрбиеленушілердің денсаулығына қамқорлық жасау - «Қарлығаш» балабақшасының басым бағыттарының бірі. Жүйелі профилактика мен барлық қызметтің үйлесімді жұмыс істеуі балалардың толыққанды дамуы мен оқуы үшін қауіпсіз жағдай жасауға мүмкіндік береді.
