Жыл сайын 20 қарашада бүкіл әлемде Халықаралық педиатрлар күні атап өтіледі. Бұл мереке өмірдің алғашқы айларынан бастап баланың жанында болып, оның өсу кезеңдерінде қолдау көрсететін мамандарға арналған. Сол күні Декларация мен Конвенция қабылдануына байланысты Бүкіләлемдік балалар күні де атап өтіледі. Бұл екі мерекенің біріктірілуі балалардың денсаулығына қамқорлық пен олардың құқықтарын құрметтеудің тығыз байланысын көрсетеді: балабақшадағы педиатрлар осы идеяны қолдап, балалардың дені сау және бақытты болып өсуі үшін қолайлы орта жасайды.
«Қарлығаш» балабақшасында педиатрлардың жұмысы ерекше байқалады: балалар осында күннің көп бөлігін өткізеді, денсаулығын күтуге байланысты алғашқы әдеттері қалыптасады, иммунитеті нығаяды. Балабақшадағы педиатр тек дәрігер емес, сонымен қатар балаларға нағыз қамқоршы жан, оның жұмысы ата-аналарға көрінбесе де, балалардың әл-ауқатына күн сайын әсер етеді. Ол медициналық үдерістерді үйлестіреді, балалардың жағдайын бақылайды, тәрбиешілер мен ата-аналарға кеңес береді, әр баланың тұлға екенін көрсетеді. Ол күн сайын көзге көрінбейтін, бірақ маңызды әрекеттер жасайды, солардың барлығы қауіпсіз, мейірімді және үйлесімді ортаны қалыптастырады.
Профилактика – жұмыстың басты өзегі. Таңертеңгі қабылдау, балалардың жағдайын бақылау, аурудың алғашқы белгілерін дер кезінде анықтау жұқпалы дерттің таралу қаупін айтарлықтай төмендетеді. Педиатр топтардың жағдайын талдап, алдын алу шараларын нақтылайды, керек кезінде ерекше бақылауды қажет ететін балаларға жеке жоспар құрады. Соның арқасында ең қиын маусымның өзінде балабақшаның тұрақты жұмысын қамтамасыз етуге мүмкіндік болады.
Маңызды бағыттардың бірі – санитарлық-ағарту жұмысы. Педиатр тәрбиешілер мен ата-аналарға алғашқы көмек дағдыларын үйретеді, дұрыс тамақтану мен жас ерекшелігіне сай даму қағидаттарын түсіндіреді, медициналық ақпаратты сұрыптап, сенімді дереккөзі бола алады. Ақпарат алатын да, беретін де алаң көп кезеңде оның кәсіби тұрғыда айтқан кеңестері ең маңызды дүние.
Педиатрдың тағы бір міндеті – денсаулық пен дамуды жүйелі бақылау. Балаларды жоспарлы түрде тексеріп тұру, олардың физикалық тұрғыдан дамуын бағалау, вакцина алуды қадағалау, бейінді мамандармен өзара іс-қимыл жасау баланың даму динамикасын дер кезінде анықтап отыруға мүмкіндік береді. Қажет болған жағдайда маман кеңестерін ұйымдастырып, қосымша тексерулерді ұйымдастырады. Мұндай жүйелі тәсіл баланың бейімделуіне және оқуына әсер етуі мүмкін ерекшеліктерді ерте анықтауға жағдай жасайды.
Жұмыстың ажырамас бөлігі - отбасымен серіктестік. Бүгінгі таңда ата-аналармен баланың ұйқысы, тамақтануы, бейімделуі, эмоциялық жағдайы жөнінде ашық әңгімелесудің өзі септігін тигізеді. Педиатр олардың алаңдаушылығын сейілтіп, әр балаға жеке күн тәртібін жасауға, дұрыс шешім қабылдауға көмектеседі.
Мұндай жұмыстың көрінбейтін, бірақ аса жауапты тұсы да бар. Ол кенеттен болған жағдайларда жедел көмек көрсету. Көгеріп қалу, жарақат, аллергиялық реакция, кенеттен көтерілген қызу – бәрі дәлдік пен кәсіби сенімділікті талап етеді. Педиатр жылдам әрі сабырлылықпен әрекет етіп, баланың қауіпсіздігін қамтамасыз етеді және ата-анаға дер кезінде хабарлайды.
Педиатрлар күні – балалардың тыныштығын қорғау және денсаулығын сақтау үшін қаншалықты қажырлы еңбек етуді талап ететінін ұмытпай, бағалайтын күн. Баланың дені сау, белсенді, бақытты өсетін, жанында әрдайым қамқор маман бар екенін сезіндіретін балабақшада педиатрлардың орны ерекше екенін тағы да бір дәлелдейді.
Бүгін оларға айтылар ең маңызды сөз – алғыс. Балалар үшін әр күні жанын салып еңбек етіп жүргендеріңіз үшін рақмет. Баланың жанынан табылып, оның тірегіне айналғандарыңыз үшін рақмет.
