«Таза Қазақстан» республикалық экологиялық акциясы аясында Қазақстан Республикасы Президенті Іс басқармасы Медициналық орталығының «Қарлығаш» балабақшасында аумақты абаттандыру және санитарлық тазалау бойынша сенбілік ұйымдастырылды.
Іс-шараға 103 қызметкер қатысты. Жұмыс барысында 32 қап қоқыс жиналып, шығарылды. Ұжым балабақша аумағын көркейтуге және инфрақұрылым нысандарын жаңартуға ерекше көңіл бөлді.
Қызметкерлер аумақ қоршауын сырлап, шағын сәулеттік нысандарды жаңартты, сондай-ақ серуен алаңдарындағы беседкалардың едендерін бояды. Атқарылған жұмыстар аумақтың келбетін жақсартып, тәрбиеленушілер үшін қолайлы әрі қауіпсіз орта қалыптастыруға мүмкіндік берді.
«Қарлығаш» балабақшасы қоршаған ортаға ұқыпты қарау мәдениетін қалыптастыруға және балалар үшін жайлы білім беру ортасын құруға бағытталған экологиялық бастамаларды дәстүрлі түрде қолдап келеді.
