ҚР ПІБ Медициналық орталығының «Қарлығаш» балабақшасының тәрбиеленушілері Қазақстан Республикасының Ұлттық музейіне барып, еліміздің бай тарихымен және мәдени мұрасымен танысты. Сапардың басты мақсаты – балалардың бойында отансүйгіштік сезімді ояту және қоршаған орта туралы танымдық көкжиегін кеңейту.
Танымдық экскурсия барысында бүлдіршіндер музейдің экспозициялық залдарын аралап, көне дәуір жәдігерлері мен бірегей тарихи жұрнақтарды тамашалады. Кішкентай қонақтардың ерекше қызығушылығын ежелгі жануарлар әлеміне арналған көрмелер мен интерактивті аймақтар тудырды. Олар мұнда өткен кезеңнің тыныс-тіршілігін өз көздерімен көріп, ерекше әсер алды.
Экспонаттарды тамашалаумен қатар, балаларға музей мамандары қызықты мәліметтерді қарапайым әрі түсінікті тілде баяндап берді. Бүлдіршіндер өздерін қызықтырған сұрақтарын қойып, тарих қойнауына терең бойлады. Мұндай тікелей қарым-қатынас олардың танымдық белсенділігін арттырып, көргендерін есте жақсы сақтауға көмектесті.
Мұндай мазмұнды мәдени шаралар балалардың дүниетанымын кеңейтіп қана қоймай, бойында Отанға деген сүйіспеншілік пен құнды жәдігерлерге деген құрмет сезімін қалыптастырады. Ұлттық музейге жасалған бұл сапар балабақша тәрбиеленушілері үшін ұмытылмас әсерлер мен жаңа білімге толы тағылымды күн болды.
