ҚР Президенті Іс басқармасының Медициналық орталығының «Қарлығаш» балабақшасында Қазақстан халқының тілдері күніне орай Тілдер апталығы өтті.

Балабақшадағы тілдік орта күнделікті қалыптасып, баланың білім алу үдерісінде, ойындарда, шығармашылық жұмыстарда және қарым-қатынаста табиғи түрде қолданылады. Бұл ортаның негізін қазақ тілі құрайды, ал орыс және ағылшын тілдерімен танысу балалардың қарым-қатынас, таным және даму мүмкіндіктерін кеңейтеді.

Тілдер апталығы аясында күнделікті жүргізілетін жұмыс тақырыптық бағытта жалғасын тапты. Топтарда тілге қатысты ойындар, шығармашылық тапсырмалар, сұрақ-жауап, музыкалық және танымдық сабақтар ұйымдастырылды. Ойын және практикалық тапсырмалар арқылы балалар тілдердің ерекшеліктерімен, Қазақстан халқының мәдениеті мен дәстүрлерімен танысып, сөйлеу және коммуникативтік дағдыларын дамытты.

Бағдарламаның маңызды бөлігі қазақ тіліне арналды. Балалар өлеңдер оқып, әндер тыңдап, орындады, сөйлесіп ойнайтын ойындарға қатысты, жаңа сөздер мен сөз тіркестерімен танысып, шығармашылық тапсырмаларды орындады. Мұндай іс-шаралар балаларға тілді өздеріне таныс әрі қызықты тәсілдер – ойын, музыка, қимыл-қозғалыс және шығармашылық арқылы меңгеруге мүмкіндік берді.

Орыс және ағылшын тілдері де ойын және танымдық форматта ұсынылды. Мектеп жасына дейінгі балалар жаңа сөздермен танысып, олардың айтылу ерекшеліктеріне назар аударды, есте сақтау мен зейінге арналған тапсырмаларды орындады, шағын диалогтар құрып, шығармашылық жұмыстарға қатысты.

Сонымен қатар «Қарлығаш» балабақшасындағы тілдік жұмыс тақырыптық апталықпен ғана шектелмейді. Ол күнделікті білім беру үдерісінің бір бөлігі ретінде ұйымдастырылып, балаларға тілді әртүрлі іс-әрекет барысында қолдануға және сөйлеуге, қарым-қатынас жасау мүмкіндіктерін біртіндеп кеңейтуге жағдай жасайды.

«Мектеп жасына дейінгі бала үшін тіл – ең алдымен қарым-қатынас жасау құралы. Сондықтан балалардың жекелеген сөздерді жаттап қана қоймай, сабақта, ойнаған кезде, шығармашылық жұмыс барысында және құрдастарымен сөйлескен кезде естіп, қолдануы маңызды. Тілдер апталығы осы жұмысты балалар үшін одан әрі қызықты әрі мазмұнды етуге мүмкіндік береді», – дейді балабақша педагогтері.

Осылайша, Тілдер апталығы сөйлеу тілін дамыту, шығармашылық, танымдық белсенділік пен Қазақстанның мәдени әралуандығымен танысуды бір арнаға тоғыстырды. «Қарлығаш» балабақшасында тілдік даму заманауи мектепке дейінгі білім берудің маңызды бағыттарының бірі ретінде қарастырылады. Сондықтан мұндай іс-шаралар балалар үшін қарым-қатынас жасауға, шығармашылығын танытуға, жаңа дүниені танып-білуге мүмкіндік беретін қызықты ортаға айналады.