Bilimdi El ақпараттық порталында «Қарлығаш» балабақшасындағы құндылыққа негізделген тәрбие жүйесіне арналған «Абстрактты ережелер емес, өмірлік тәжірибе: мектеп жасына дейінгі баланың адамгершілік қасиеттері қалай қалыптасады?» атты материал жарияланды. Жарияланымда «Адал азамат» біртұтас тәрбие бағдарламасын іске асыру аясында балалардың күнделікті іс-әрекеті арқылы адалдық, жауапкершілік, айналасындағыларға құрмет және өзара көмек көрсету қасиеттерін қалыптастыруға бағытталған балабақша тәжірибесі баяндалады.
Балабақшада адамгершілік тәрбиесі баланың күнделікті өмірінің ажырамас бөлігі ретінде қарастырылады. Осы бағыттағы жұмысты жүзеге асыру үшін тәрбиелік қызметтің түрлі бағыттарын біріктіретін тақырыптық кеңістіктер мен жобалар ұйымдастырылған. Медиашығармашылық алаңында балалар қарым-қатынас жасау дағдыларын меңгеріп, өзгенің жеке шекарасын құрметтеуге үйренеді. Ұлттық дәстүрлермен танысу халық ойындары мен қолөнер арқылы жүзеге асырылады, ал EcoTeam жобасы қоршаған ортаға жауапкершілікпен қарауды қалыптастырады. Жасампаз еңбек мектебінде тәрбиеленушілер іс-шараларды ұйымдастыруға қатысып, өздеріне жүктелген тапсырмаларды орындайды және ортақ еңбектің нәтижесін бағалауды үйренеді.
Күнделікті өмірде адамгершілік құндылықтарды қалыптастыруға да ерекше көңіл бөлінеді. «Өнегелі 15 минут» жобасы аясындағы таңғы әңгімелер, ұлттық ойындар мен «Адалдық алаңы» балаларды өзара келісуге, құрдастарының мүддесін ескеруге, келіспеушіліктерді шешуге және өз әрекеттері үшін жауап беруге баулиды. Бұл үдерісте отбасымен ынтымақтастық та маңызды орын алады. Бірлескен шеберлік сабақтары, спорттық эстафеталар мен отбасылық бастамалар балалар тәрбиесіндегі педагогтер мен ата-аналардың күш-жігерін біріктіруге мүмкіндік береді.
«Қарлығаш» балабақшасының тәжірибесі адалдық, жауапкершілік пен құрметтің құрғақ өсиет арқылы емес, баланың күнделікті өмірлік тәжірибесі негізінде қалыптасатынын көрсетеді. Досына көмектесу, өз кезегін күту, ортақ іске атсалысу және өз қателігін мойындай білу сияқты қарапайым әрекеттерден баланың адамгершілік мәдениеті мен азаматтық жауапкершілігінің негізі қаланады.
Толық нұсқасын осы сілтеме арқылы оқуга болады.
