Қазақстан Республикасы Президенті Іс басқармасы Медициналық орталығының «Қарлығаш» балабақшасының мектепалды топтарының тәрбиеленушілері мектепке дейінгі және бастауыш білім беру арасындағы сабақтастықты қамтамасыз етуге бағытталған экскурсиялық жоба аясында Астана қаласы әкімдігінің Әлихан Бөкейхан атындағы №76 мектеп-лицейіне барды.
Экскурсия балабақша мен мектеп арасындағы алдын ала келісім негізінде ұйымдастырылып, балаларды жаңа білім беру кезеңіне жұмсақ бейімдеуді көздеді.
Экскурсия барысында тәрбиеленуші мектеп ортасымен танысып, оқу кабинеттерін аралады. Балалар үшін математика пәні бойынша ойын форматындағы танымдық сабақтар ұйымдастырылып, сондай-ақ спорттық ойындар өткізілді.
Сонымен қатар, тәрбиеленушілер мектеп кітапханасына және Әлихан Бөкейхан атындағы мектеп мұражайына барып, білім беру кеңістігіндегі тарихи-мәдени мазмұнмен танысты.
Мұндай іс-шаралар балалардың мектепке деген сенімін арттыруға, алаңдаушылық деңгейін төмендетуге және білім беру бағдарламаларының сабақтастығын қамтамасыз етуге бағытталған жүйелі жұмыстың маңызды бөлігі болып табылады.
