2026 жылғы 26 тамызда Астанада «Мектепке дейінгі білім берудің заманауи моделі: ерте дамыту, ұлттық құндылықтар және бастауыш біліммен сабақтастық» тақырыбындағы тамыз кеңесінің секциялық отырысы аясында ҚР ПІБ Медициналық орталығының «Қарлығаш» балабақшалары базасында экскурсиялық тур өтті.

Іс-шараға Қазақстанның барлық өңірінен 200-ге жуық маман қатысты. Олардың қатарында Қазақстан Республикасы Оқу-ағарту министрлігінің, Астана қаласы Білім басқармасының, Астана қаласы әкімдігінің Әдістемелік орталығының, Қазақстан Республикасы Оқу-ағарту министрлігінің Балаларды ерте дамыту институтының өкілдері, сондай-ақ мектепке дейінгі білім беру ұйымдарының басшылары болды.

Іс-шараның ашылуында Қазақстан Республикасы Оқу-ағарту министрлігінің Мектепке дейінгі білім беру департаменті директорының орынбасары Динара Абылканова, Департаменттің басқарма басшысы Динара Баймурзаева, Мониторинг, талдау және стратегиялық дамыту басқармасының басшысы Айгүл Джумагулова, сондай-ақ Департаменттің бас сарапшысы Мерген Абдиров құттықтау сөз сөйледі.

Экскурсиялық тур білім беру ортасын ұйымдастырудың заманауи тәсілдерімен, балаларды ерте дамытумен, ұлттық құндылықтарды қалыптастырумен және мектепке дейінгі және бастауыш білім беру арасындағы сабақтастықты қамтамасыз етумен танысуға арналған практикалық алаңға айналды.

Аталған бағыттардың өзектілігі Август конференциясының пленарлық отырысында Мемлекет басшысы Қасым-Жомарт Тоқаев атап өткен міндеттермен үндеседі. Президент өз сөзінде адами капиталды дамытудағы білім беру жүйесінің ерекше рөліне, білімді, прогрессивті және патриоттық ұрпақ тәрбиелеуге, сондай-ақ балалардың жан-жақты дамуына жағдай жасаудың маңыздылығына тоқталды. Осы тұрғыдан алғанда, мектепке дейінгі білім беру ұйымдары арасындағы тәжірибе алмасу білім беру жүйесін одан әрі жетілдірудің маңызды бөлігі болып табылады.

Қатысушылар «Қарлығаш» балабақшаларының екі нысанына барды. Экскурсия барысында білім беру және дамыту кеңістіктері, медициналық сүйемелдеу жүйесі, сондай-ақ мектепке дейінгі жастағы балалармен жұмыс барысында қолданылатын заманауи технологиялар мен практикалар таныстырылды.

Баланың жан-жақты дамуына бағытталған практикалық шешімдерге ерекше назар аударылды. Қатысушылар жүзу және дене шынықтыру сабақтарымен, этникалық ертегілермен, мектепке дейінгі жастағы балаларды физика негіздерімен таныстыруға бағытталған STEM тәсілімен, эмоционалдық интеллектіні дамыту әдістемесімен, сондай-ақ ағылшын тілін және математиканы сингапурлық тәжірибе негізінде оқыту тәсілдерімен танысты.

Ұсынылған практикалар мектепке дейінгі жастағы балаларды дамытуға кешенді көзқарасты көрсетті. Мұнда білім беру технологиялары баланың физикалық, зияткерлік, эмоционалдық және адамгершілік тұрғыдан дамуымен ұштастырылады. Мұндай тәсіл Мемлекет басшысы атап өткен заманауи технологиялар мен білім беру инфрақұрылымының мазмұнмен толықтырылып, адами әлеуетті дамытуға және өскелең ұрпақты тәрбиелеуге бағытталуы тиіс деген ұстаныммен үндеседі.

Экскурсияның жекелеген бағыттары медициналық блок пен Check-up жүйесін, тұз шахтасын, инфрақызыл саунаны, сенсорлық кабинетті, логопед қызметін, гидропоника аймағын, интерактивті қабырғалар мен еденді, медиа-студияны және STEM зертханасын қамтыды.

Экскурсияның маңызды бөлігі баланың білім алу, физикалық, эмоционалдық және медициналық тұрғыдан сүйемелденуін біріктіретін шешімдерді көрсетуге арналды. Мұндай кешенді тәсіл мектепке дейінгі ұйымды баланы мектепке дайындайтын кеңістік ретінде ғана емес, оның толыққанды дамуына жағдай жасайтын орта ретінде қарастыруға мүмкіндік береді.

Бағдарламаның жеке бөлігі «Экореволюция» көрмесіне арналды. Экспозиция «Қарлығаш» балабақшаларындағы білім беру жұмысының экологиялық бағытын таныстырып, балалардың қоршаған ортаға ұқыпты қарауын және экологиялық мәдениетін қалыптастыруға бағытталған практикаларды көрсетті. Экологиялық тәрбие бағытына Мемлекет басшысының сөзінде де ерекше назар аударылды.

Экскурсиялық тур қатысушыларға «Қарлығаш» балабақшаларындағы инфрақұрылымдық және білім беру шешімдерімен танысып қана қоймай, олардың білім беру процесінде іс жүзінде қолданылуын көруге мүмкіндік берді.

Мұндай формат тиімді педагогикалық тәжірибені тарату тұрғысынан да маңызды. Мемлекет басшысы білім беруді дамыту үшін жаңа шешімдерді енгізумен қатар, олардың практикалық тиімділігін қамтамасыз ету, тиімді тәжірибені зерделеу және тарату қажеттігін атап өтті.

Іс-шара соңында қатысушылар өзара пікір алмасып, кері байланыс ұсынды.

Мұндай кәсіби алаңдар мектепке дейінгі білім беру ұйымдарының педагогтері мен басшылары арасында тәжірибе алмасуға, тиімді практикаларды өңірлерде таратуға және балаларға арналған заманауи білім беру ортасын одан әрі жетілдіруге мүмкіндік береді.